E te tai whakarunga, e te tai whakararo, pari mai ki te ākau o Ngā Pae o te Māramatanga e mihi manahau ake ki a tātou katoa i runga i tēnei wiki o te reo Māori.
Kakama mai i runga i ngā ngaru pae o whakapeto ngoi, i ngā ngaru pou o whakatangetange riaka. Kia rite ai te reo ki te tai o te tahuna moana, ka ngunguru i te pō, ka ngunguru i te ao.
Nā reira, me whakaihuwaka tātou i a tātou anō, kia huakina mai te whatitoka o te whare o te reo Māori, kia whiua reretia ana ki tēnā tae ki tēnā awaawa ki tēnā moka ki tēnā kōtihitihi.
Mā wai te aratokotoko nei e hiki? Mā mātou anō. Mā koutou hoki. Otirā, mā tātou katoa.