Dr Huirangi Eruera Waikerepuru CNZM (1 April 1929 – 8 April 2020)

Huia te pō
Huia te kāhui wairua kia pū tahi, kia pū tini, kia pū mano
Huia te ao mārama
Huia te manawa taki ora kia mae, kia rāwakiwaki, kia ea te haku tangi ake nei.
Kua tau te ataata o te maunga tītōhea ki te raki, ki te tonga, ki uta, ki tai.
He aha kei tōna ataata? He kohu, he roi, he tōmairangi; he maimai aroha i te kāhui rangi ki te nukuroa. He pokenga whenua, he pokenga whatumanawa. Ko koe, e koro, kei te tauihu, kei te taurapa, kei te riu o tōu waka; ko koe ki te hoe, ko koe ki te urungi; nāu te taki e pae ai tōu waka ki uta, ki reira okioki e. Haere e koro, Huirangi, ki te takotoranga tē maunuhia anō ai.

Nā, Ngā Pae o te Māramatanga